每次帶完比賽，都會有好多人包括 朋友 記者 觀眾 老師 問我諸如此類既問題：
「做咩咁怒氣呀？」
「唔使咁緊張丫！」
「小朋友啫，唔好咁激動！」
好多時我都會一句「唉」搖搖頭 或者 一笑置之，都唔會多作解釋，原因好簡單，因為你地唔會明白。
唔明白咩？ 好簡單一句問題。
你地見過學生喊嗎？見過，做老師一定見過。
但你地見過十幾個學生一齊係你面前喊嗎？
我相信唔係個個老師教練都經歷過，而經歷過既教練一定會明白個種心酸。
身為一個教練，當你既經歷經驗入面曾經出現呢個心酸既畫面，你一定唔希望再次見到。
但學生好有趣，可能係性格樂天天真既關係，佢地即使經歷過，但印象都唔會太深刻，什至忘記左，從而令到比賽入面出現同樣既問題，犯同樣既錯誤，做同樣既傻事。
而我而家就可以答你地：
因為我唔想再見到十幾個人，坐係我前面，掩住塊面，抱住個頭一齊喊。
所以先咁激動，不停話，不停叫，不停提，不停鬧，成個癲佬咁，緊張過自己打波。
我唔想學生完場先黎喊住同我講：對唔住，後悔，內疚，自責。
學界既光陰好短暫，唔好俾自己後悔。
只要大家可以一條心，搏盡無悔；
我可以唔介意形象，好似個癲佬咁，係場邊拍枱掟野咁鬧你地。
但我介意大家事後內疚，後悔離場，
「因為我真係好唔鐘意見到人喊！」
Search